لو كتبت «خدمة عملاء إندرايفر» في جوجل، فإنت غالبًا واحد من تلاتة: راكب أو سواق عنده مشكلة ومحتاج يكلم الشركة، أو حد عايز يشتغل سواق على التطبيق وبيدوّر على الشروط، أو حد عايز وظيفة في مكتب إندرايفر في القاهرة.
عرفنا ده من الكلمات اللي الناس بتوصل بيها للصفحة دي: «رقم خدمة عملاء اندريفر» و«شروط اندرايفر» بيتكرروا أكتر بكتير من «وظائف». فالصفحة دي فيها التلاتة، كل واحد في حتته.
لو عندك مشكلة في مشوار: مفيش رقم تليفون
دوّرنا على رقم خدمة عملاء رسمي لإندرايفر في مصر وما لقيناش. الشركة نفسها بتقول في صفحتها على متجر أبل إن التواصل بيكون بالشات من جوه التطبيق أو بالإيميل support@indrive.com، ومع الإيميل تبعت رقم التليفون اللي متسجل بيه عشان يلاقوا حسابك أسرع.
من التطبيق: افتح القايمة الجانبية وادخل على «الدعم» أو «الأمان». ولو إنت جوه المشوار نفسه، فيه زرار مساعدة على شاشة الرحلة، ومنه كمان تقدر تتصل بالشرطة أو الإسعاف على طول. قبل ما تكتب الشكوى جهّز رقم الرحلة من سجل المشاوير، لأنهم هيطلبوه منك في الأول.
وخد بالك من حاجة: أي رقم موبايل منشور على فيسبوك على إنه «خط إندرايفر الساخن» اتعامل معاه بشك. إحنا ما لقيناش أي رقم رسمي معلن، واللي بيطلب منك بيانات حسابك أو تحويل فلوس على رقم ده مش من الشركة.
السواقة على التطبيق: شغل، بس مش وظيفة
ده الفرق اللي ناس كتير مش واخدة بالها منه. لما تتسجل سواق على إندرايفر، إنت مش موظف عند الشركة. مفيش مرتب ثابت ولا عقد عمل. إنت بتستخدم التطبيق عشان تلاقي زباين، والشركة بتاخد نسبة من كل مشوار.
صفحة المساعدة الرسمية لإندرايفر مصر بتقول إن المطلوب رخصة سارية وسن 18 سنة أو أكتر، وإن العربية متكونش متسجلة إنها حطام أو معاد تصنيعها. التسجيل من التطبيق نفسه: تحوّل لوضع السواق، تدخل على «التسجيل أونلاين»، ترفع الأوراق، وتستنى الموافقة.
المواقع الإخبارية بتضيف تفاصيل أكتر، وهنا لازم نكون صرحاء: الأرقام مش متفقة. مصراوي كتب إن السن فوق 18 وإن خبرة الرخصة 3 سنين لفئة (ب) و5 لفئة (د)، وإن موديل العربية من 1995 وطالع والموتوسيكل من 2010. وموقع بانكير كتب إن السن «لا يقل عن 25 عامًا لمعظم الفئات». الصفحة الرسمية بتقول 18، فإحنا ماشيين على 18. بس لو سنك بين الاتنين، التطبيق هو اللي هيقولك الكلمة الأخيرة وإنت بتسجل.
الأوراق حسب بانكير: الرخصة، البطاقة وش وضهر، رخصة العربية وش وضهر، صورة للعربية، صورة شخصية حديثة، وفيش جنائي.
الشركة بتاخد كام؟
في خبر من يناير 2026 الشركة قالت إن نسبتها حوالي 10%، وإن المنافسين بياخدوا لحد 25%. وفي نوفمبر 2025 عملت عرض في إسكندرية بنسبة 1% بس، وده كان عرض مؤقت لفترة الإطلاق، مش النسبة العادية.
رأينا: النسبة القليلة دي حقيقية، بس مش هي اللي هتحدد دخلك. في إندرايفر الراكب هو اللي بيعرض السعر، وإنت بتقبل أو بتعرض سعر تاني. يعني السواق اللي بيقبل أي عرض عشان يفضل شغال بيخسر الفرق اللي كسبه من النسبة وزيادة. اللي بيكسب هو اللي حافظ تكلفة المشوار عليه كام بنزين واستهلاك، وبيرفض اللي تحتها.
ولو عايز تقارن بشغل سواق بمرتب ثابت وتأمينات، عملنا صفحة كاملة عن مرتب السواق في مصر من إعلانات حقيقية.
وظايف مكتب القاهرة: قرينا 15 إعلان
إندرايفر عندها مكتب في القاهرة، وده مش مكتب لمصر بس. لقينا إعلانات لفريق دعم بيخدم الشرق الأوسط كله، ولقينا إعلان في القاهرة لوظيفة مراجعة أوراق سواقين أمريكا اللاتينية. يعني جزء من الشغل هنا بيخدم دول تانية، وده بيفسر ليه الإنجليزي مطلوب في وظايف كتير.
جمعنا 15 إعلان لإندرايفر في القاهرة اتنشروا بين 2025 و2026 على مواقع توظيف بتنقل من موقع الشركة. ودي أهم حاجة طلعنا بيها: في كل اللي قريناه، ما لقيناش رقم مرتب واحد. ولا إعلان.
وكنا إحنا نفسنا كاتبين في الصفحة دي قبل كده رقم 15,000 جنيه. رجعنا ندوّر على مصدره وما لقيناش إعلان رسمي واحد يقوله، فشيلناه. أي موقع بيقولك رقم محدد لمرتب خدمة العملاء في إندرايفر، اسأله جابه منين.
| الوظيفة | نظام الشغل | اللي لفت نظرنا |
|---|---|---|
| Customer Support Specialist | من المكتب، شيفتات | دعم بالشات والإيميل ومكالمات صادرة للعملاء |
| Technical Support Specialist | من المكتب، شيفتات | 5 أيام شغل ويومين إجازة، والشيفتات بتلف صباحي ونهاري وليلي. وفيه تدريب في الأول و«مرتب ثابت» من غير رقم |
| Moderator Photocontrol | من البيت، شيفتات | مراجعة صور السواقين والعربيات |
| Online Checkout Specialist | هجين | مراجعة رخص وبطايق السواقين قبل الموافقة |
| Customer Support Group Lead | من المكتب | محتاج سنتين خبرة على الأقل كمشرف كول سنتر |
| CS Content Designer | هجين | كتابة ردود ومحتوى الدعم |
| Workforce Manager | دوام كامل | بيخطط عدد موظفي الدعم في الشركة ومع شركات التعهيد |
الإعلان الأخير ده بيقول حاجة مهمة: إندرايفر بتشغّل دعم عملاء بموظفين عندها ومع شركات تعهيد. يعني ممكن تلاقي نفسك بترد على عملاء إندرايفر وإنت متعين في شركة كول سنتر تانية. ساعتها المرتب والعقد بتوع الشركة اللي عيّنتك، مش بتوع إندرايفر. ولو عايز تعرف أرقام الكول سنتر في مصر عمومًا، عندنا صفحة مرتبات خدمة العملاء من إعلانات مفتوحة.
أغلب الإعلانات فيها جملة بالمعنى ده: لو ما ردّيناش عليك، يبقى مفيش مكان مناسب ليك دلوقتي. فمتستناش مكالمة.
تقدّم فين؟
الوظايف الرسمية بتتنشر على careers.indrive.com. لما فتحناه النهارده، 17 نوفمبر 2026، صفحة التقديم ما كانش فيها ولا وظيفة مفتوحة، وكان فيه بس فورم تسيب فيه بياناتك لو نزلت وظيفة. الإعلانات بتنزل وتتقفل بسرعة، فلو مهتم، ارجع للموقع كل أسبوع أو تابع الشركة على لينكد إن.
والقاعدة اللي مفيهاش استثناء: لو حد طلب منك فلوس عشان يشغّلك في إندرايفر، ده نصب. لا رسوم تدريب، ولا رسوم ملف.
أسئلة شائعة
فيه رقم خدمة عملاء لإندرايفر في مصر؟
ما لقيناش رقم رسمي. التواصل بيكون بالشات من التطبيق أو بالإيميل support@indrive.com.
إيه شروط الشغل سواق على إندرايفر؟
حسب الصفحة الرسمية: رخصة سارية، وسن 18 سنة أو أكتر، وعربية مش متسجلة حطام أو معاد تصنيعها. والتسجيل من جوه التطبيق.
مرتب خدمة العملاء في إندرايفر كام؟
مش معلن. قرينا 15 إعلان للشركة في القاهرة وما لقيناش ولا واحد فيه رقم.
لازم أعرف إنجليزي؟
في وظايف كتير أيوه، لأن مكتب القاهرة بيخدم دول تانية غير مصر. في السواقة على التطبيق لأ.

